قاليك البوسطة رجعات بانكة

البريد بنك مشروع سهر على إنتاجه وإخراجه للوجود 72 من اجود الكفائات ماشي غير على الصعيد الوطني بل على الصعيد العالمي كاع... حيت راه غير فالمغرب كما قلنا سابقا اللي ممكن هادشي ...72 شخص خدمو بالنهار وبالليل ولكن يمكن راه خدمو بالليل كثر ... حيت بالليل البوسطة تتكون سادة ومكنش شي بريدي اللي غادي يجي يبرزطهم فهاد المشروع الكبير اللي كانو خدامين فيه ... شحال من مرة تنكون دايز قدام المديرية العامة وتنشوف ضوء مكتب مدير الموارد البشرية مزال شاعل ... منين سولت قالولي راه مازال خدام مع الكاتبة ديالو فإنجاز مشروع البريد بنك ... وشحال من مرة سمعت انهم منين تيساليو "الخدمة" تيخدهم الشيفور وتيكونو عيانين "بزاف" لشي بلاصة باش يفوجو شوية لدرجة ان داك السائق قدم طلب المغادرة الطوعية ... عرفتو علاش ? حيت داك السائق راه غير بريدي ميقدرش يخدم بزاف بحال داك المتعاقد اللي متيعياش من الخدمة ... وهادي نقطة مهمة راه خاص حتى السائقين يجيبهم من المتعاقدين ... المشكلة ان البريديين متيبغيوش اللي يخدم "بزاف" ... ناضو شكاو بهاد الكاتيبة المجدة المتفانية نيت فالعمل ديالها بل اللي تتقوم باعمال اخرى فسبيل المؤسسة وفسبيل الوطن كاع ... ناضو البريديين احتجو على هادشي وبالفعل تم استبعاد هاد الكاتبة وفرقوها على المدير ديالها مسكينة وصيفطوها لشي قنت أخور ...


وكيف ما قلت فالكاتبة ديال السيد المدير شاركات فإنجاز واحد النصيب من مشروع البريد بنك ... واللي تيدل على مشاركة العنصر النسوي هي صورة الشباك الأوتوماتيكي اللي فيه واحد اللمسة نسائية واخة شوية حشومة ولكن عندها معاني عميقة فالسياسة اللتي تينهجها متعاقدو بريد المغرب ... تتشوفو باللي داك العجب شاداه سكوتش خدمة الإرساليات أمانة باش الشباك الأوتوماتيكي للبريد بنك ميسيلش وهنا تتبان لينا روح التأخي بين الأقطاب أو ما يسمى la synergie"""...


سالة المشروع وسالو معاه فلوس صحاح ديال البوسطة ... والمال السايب تيعلم السرقة ... ولوحماية هاد المال من السرقة قرر متعاقدونا الشرفاء انهم خاصهم يحافضو على هاذ المال من دوك البريديين اللي باغين يخرجو على البريد فقامو بتقسيم 430 مليون ... باش يخبعوهم من أيادي البريديين ...

غير راه منين المتعاقدين كانو تيخدمو غير بالليل كيفما قلنا فاتو عليهم بزاف ديال الأشياء حيت راه معروف باللي فالليل تيكون الضلام ... والضلام ماتايبان فيه والو ... وبما ان البريديين الوحيدين اللي خدمو معاهم هم الكاتبات ديالهم اللي تيعرفو البوسطة غير نهار تيدوز المانضة... باش يمشيو يخرجو الفلوس.... وكاين كاع اللي دايرت الحساب مع البانكة ومهنية راسها ... فالنتيجة كانت مشروع نهار جاو يلبسوه لسيدنا البريد مجاش قدو ... وناضو البريديين الحقودين تيحتجو على هاد المشروع الرائع حيت معرفوش ليه ... وكاين كاع اللي وصل بيه البغض انه طالب باش البريد يدير الإضراب ...وكاين اللي مشى تيقول البريد بانكة من شحال هادي هاد الناس غير كانو تيرسمو فالماء ... راه خاصنا كبريديين نكبرو عقلنا شوية ونعرفو ان هاد المتعاقدين راه غير قابلين علينا بالسيف ياك حتى المانضة دايرين معانا زوين تيقبطو بحالنا بحالهم "تقريبا" وتيخدمو بالنهار وبالليل وراكم شايفين المديرية العامة شحال عالية يعني راه باش يوصل هاد المتعاقد للمكتب ديالو تتكون وصلات 12 ... عدا عندنا شي نقابات غير الله يستر مقابلين غير تبرزيط كل شوية يمشيو عند المتعاقدين ديالنا اللي الله يخليهم لينا باش يقولوليهم زيدولينا فالمانضة ديال البريديين .... يالاططيــف ... انا راه تنقوليكم راه إلى متحاولتوش على هاد المتعاقدين راه ممكن يغضبو ... ويحطو الفلوس اللي مخبعيهم لينا ... ونهار نقاضيوهو ...نوقفو على كلامهم... وممكن كاع يهربو ويمشيو كيما مشى السي أنس ونبقاو حابسين وأجيو شوفو شكون يجيبليكم بحال الأفكار اللي فالصورة ... ومعامن نوضو نضاربو ....


لجنة الإعلام والتواصل للكدش - قطاع البريد